5.74 BILYON ANG PERA NG PINAKAMAYAMANG PUSA SA MUNDO

Isang pusa mula sa bansang Italya ang naging ikatlong pinaka-mayamang hayop ngayon sa buong mundo. Papaano ito nangyari? Pinamanahan lang ng naman ang masuwerteng pusa ng halos ten million euros (o katumbas ng halos 5.74 bilyong piso o US$15 milyon) nang pumanaw ang mabait niyang amo na mapagmahal sa mga hayop.

Dahil sa magandang kapalarang dumating sa pusang nagngangalang Tommasino, tiyak na kaiinggitan siya ng kapwa pusa. At higit sa lahat, ng mga miron na nakatira sa bansang Italya.

Naiwan kasi sa pusa ang lahat ng ari-ariang naipundar kanyang among si Maria Assunta na pumanaw noong Nobyembre 2011 sa gulang na 94-anyos. Ayon sa mga abugado, ipinagkatiwala ni Lola Assunta ang kanyang mga lupain at ipinamanang lahat ang pag-aari nito sa  alagang pusa na si Tommasino.

Masasabing napakasuwerteng pusa nitong si Tommasino. Bakit natin ito nasabi? Kasi,  ay isa lamang  siyang pusang gala noon, na kung hindi pa makagala at pumunta sa mga bahay-bahay ay di siya makaka-tsibog. Walang permanenteng tahanang masisilungan. Nariyang nagugulpi rin siya sa kalmot at kagat ng mga pusang tumatangay ng pagkaing pinaghirapan niyang hanapin sa basurahan at bigay ng mga miron.

Hanggang sa mapadpad ang pusang galang ito sa malaking bahay ni Lola Assunta. Nang makita ang naturang pusa ng mabait na lola, naaawa ito kay Tommasino, kung kaya kinupkop na siya nito. Wala namang kamalay-malay ang naturang pusa kung sino at kung ano ang estado ng kanyang amo sa lipunan.

Ang naturang matanda ay mayroong napakalaking property portfolio ng mga bahay at villas sa buong Italya. May malaking bank account din si Lola Assunta. Sa kabila ng sobrang yaman ng matanda ay wala na itong mga kamag-anak na nananatiling buhay sa mga panahong ito.

Ang mga abogadang si Ana Orecchioni at Giacinto Canzona ay nagsabing inihabiling lahat ni Lola Assunta ang kanyang mga tinatangkilik kay Tommasino batay sa nakasaad  sa kanyang  “Last Will of Testament”.

Ang naturang kasulatan ay inilagak sa kanilang opisina sa Roma noong Oktubre taong 2009. Ipinaliwanag naman ni Orecchioni ang nilalaman ng tesmamento sa ilalim ng Italian Law. Na hindi agad-agad basta mapapasa kay Tommasino ang mga naiwang pera. Siyempre nga naman, anong malay ba ng pusa sa paggasta ng pera?

Sinasabi din sa testamento na bibigyan ng pera ang mga Worthy Anilam Association kung mayroon mang masusumpungang ganitong institusyon  sa buong Italya.

Bago namatay si Lola Maria, tinagubilinan niya ang 2 abugado tungkol sa nurse na nag-aalaga sa kanya na nanganagalang Stefania. Katulad ng una, mapagmahal din ang huli sa mga hayop lalo na sa pusa.

Si Tommasino ( nasa itaas) kalaro ang pusang alaga ng nurse na si Stephania na nag-alaga kay lola Maria Assunta. (image credit Parikaki.com)

Kung kaya, nag-desisyon sina Orecchioni na si Stefania ang taong mas karapat-dapat na mamahala ng salaping iniwan ni Lola Maria, na sa ngayon ay pag-aari ni Tommasino, na masaya na sa isang palangganang gatas at pagkain ng biscuit. Ayon naman kay Stefania, wala umano siyang ideya na ganoon kalaki ang naiwang ari-arian ng pumanaw na lola. Sisikapin niyang alagaan si Tommasino at pamahalaan ang perang namana nito kay Lola Maria.

Ang naitalang “World’s Richest Animal” ay ang asong si Gunter IV na isang German Shepherd na nakatanggap ng mahigit 90 million euros (US$138 milyon) , na ipinamana ng namatay niyang among si Karlotta Liebenstein. 

Ikalawa ang Chimpanzee na mayroong US$ 61 milyon at si Tommasino na ang sumunod  dito. Samantala, sumunod naman bilang pinakamayamang pusang naitala sa mundo kasunod ni Tommasino ang pusang si Blackie na nakatanggap ng 9 million euros, nang iwan ng kanyang namatay na among si Ben Rea ang mga ari-arian nito sa kanya noong taong 1988.